MGA SIMBAHAN SA “MORMONS” PUNO NAN MGA BAKWIT SA BAGYONG “RUBY”

ni: Norberto Betita

Sa suyat na gipitsahan Disyembre 3, 2014, na pinermahan ni Annette P. Villaces, Deputy CDRRM sanan ni Surigao City Mayor Ernesto T. Matugas, gihangyo an Mormon Church (The Church of Jesus Christ of Latter-Day Saints) sa Surigao City na gamiton an mga simbahan isip bakwitanan mahitungod na sa tagpa-abot na bagyong Ruby. Isip sanong sa hangyo sa City Disaster Risk Reduction and Management Council, gilang-an dajon ni Robert Sherwin S. Betita, District President nan Surigao Philippines District an mga lideres na iandam an simbahan para sa mga mobakwit. Gipasiguro nija na jaoy igo na gamit panhinlo sanan mga gamit para kasilyas. Ija sab gipadumduman na hangyoon an mga mamakwitay na motabang pag mentinar sa kahinlo sanan kahapsay sa simbahan.

Gikan pa duyom nan Huwebes, Disyembre 4, 2014 nagsugod na pagpamakwit an mga tawo suod sa dagat didto sa simbahan sa mga “Mormons” did-on sa Narciso St. sanan sa Brgy Luna, Ciudad nan Surigao. Una na namakwit an mga miembro na naghuya suod sa dagat basi na sa hangyo nan mga nagdumaya sa simbahan tungod sa posibilidad nan pagdako sa dagat dungan sa mga balita nan radio sanan telebisyon mahitungod na sa bagyo na “Ruby” na kusog karajaw.


Basi sa impormasyon nan Branch President na si Ernanie Anding Disyembre 4, 2014 nan duyon may 742 na ka tawo an nobakwit didto sa simbahan sa Ceniza. Laong pa ni Anding na nadugangan pa ini hantod Disyembre 6, diin sa ila karkulasyon noabot ngadto na sa sobra 800 ka mga tawo . Naggikan ini sa nagkalainlain na barangay dapit sa dagat sanan kilid sa suba sanan bukid. An tanan kwarto sa simbahan giukopahan an iban didto rakan sa “multi-purpose hall” sanan sa agihan.

An sa Brgy Luna, laong pa ni Hon. Rico A. Nagas, Brgy. Chairman, nakalista sila nan 160 ka mga pamilya na may sobra 500 ka tawo---bata ug hingkod na pangidaron, an nobakwit didto sa amo na simbahan. Ini amoy ila taghatagan nan mga hinabang na pagkaon suyod sa panahon na jadto sila sa simbahan. Gani nakita nako an pag panhatag nila nan mga pagkaon didto gajod mismo sa suyod nan simbahan.

Didto sa simbahan sa Narciso St., may 32 ka pamilya o kinatibuk-an na 124 ka tawo an nakalista isip mga bakwit.

Laong pa ni District President Betita kabahin na sa panginahanglan nan mga miembro sa simbahan na namakwit daan na sila gitudloan na kinahanglan jaoy gajod ila andam na pagkaon suyod sa tuyo ka adlaw na gitawag na “72-hour kit”. An waya gajod makaandam daan na nagpreparar an mga lideres para suportahan an ila panginahanglan na pagkaon.

                   

Mga personahi sa Department of Health (DOH) sanan Department of Welfare Services
and Development (DSWD) nobisita sa amo na mga simbahan para sutaon an kahimtang sa mga namakwit. Unom ka mga Pulis--- PO1 Lhex A. Jadumas, PO1 Mark Vincent Dayondon, SPO1 Siegfried G. Agra, PO3 Edmund P. Argente, PO2 Alfredo L. Degamon, Jr., PO1 Janebeth P. Dela Peña an isab gidestino 24 oras para pagbantay sa kahapsay sanan kalinaw.

                                 

Para pagpawaya sa kalaay samtang didto sa bakwitanan nag-andam an simbahan nan dako na telebisyon tapos nagpasalida nan mga religiyoso na mga sine para kalingawan.

Laong pa ni District President Betita na nagpasalamat an simbahan na nakaserbisyo sa kumunidad labi na sa mga tawo na nagkinahanglan nan proteksyon sa posible na kadaut tungod sa mga kalamidad, kay isa man ini na paagi sa pagpakita nan pagmahal sa mga katawhan na amoy katujoan nan katukuran sa tinuod na Simbahan ni Jesu Kristo.